ភ្នំពេញ ៖ គោលនយោបាយរបស់រាជរដ្ឋាភិបាលកម្ពុជាក្នុងអាណត្តិទី៧ នៃរដ្ឋសភា បានជំរុញឱ្យក្រសួងរៀបចំដែនដី នគរូបនីយកម្ម និងសំណង់ បន្តចុះបញ្ជីដីធ្លីជូនប្រជាពលរដ្ឋឱ្យបានចប់សព្វគ្រប់នៅក្នុងអាណត្តិទី៧នេះ ហើយក្រុមការងារក្រសួងក៏បាន និងកំពុងពន្លឿនការចុះបញ្ជីនេះយ៉ាងសកម្ម ដើម្បីបញ្ចប់ទៅតាមផែនការរបស់រាជរដ្ឋាភិបាល ។ តើការចុះបញ្ជីដីធ្លីបានផ្ដល់អត្ថប្រយោជន៍អ្វីខ្លះដល់ពលរដ្ឋ និងរាជរដ្ឋាភិបាល ?
បើតាមឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបង្ហាញពីអត្ថប្រយោជន៍នៃការចុះបញ្ជីធ្លីជូនដល់ប្រជាពលរដ្ឋ ក៏ដូចជាសាធារណជន ដោយក្នុងនោះឯកឧត្តមបានមានប្រសាសន៍ថា ការចុះវាស់វែងដីនេះ គឺមានសារសំខាន់ណាស់ ជាក់ស្ដែង ទី១.ផ្ដល់កម្មសិទ្ធិជូនប្រជាជនដែលមិនទាន់មានបណ្ណកម្មសិទ្ធិលើដីធ្លីរបស់ខ្លួន, ទី២. បញ្ចប់វិវាទ ឬទំនាស់ដីធ្លីរវាងប្រជាជន និងប្រជាជន ពីព្រោះថាការចុះបញ្ជីនឹងទទួលបានបណ្ណកម្មសិទិ្ធដីធ្លី ដែលវាបានបញ្ជាក់ថាដីនោះ គឺជាកម្មសិទ្ធិរបស់អ្នកណាម្នាក់ ហើយនៅពេលចុះវាស់វែង និងចេញបណ្ណកម្មសិទ្ធិហើយនោះ គឹមិនអាចតវ៉ា ឬមានវិវាទនឹងគ្នាបានទៀតឡើយ ។
ឯកឧត្តមបញ្ជាក់ថា ការចុះវាស់វែងដីនេះ ក៏ជាគោលនយោបាយថ្មីមួយដើម្បីបញ្ចប់វិវាទដីធ្លីនៅក្នុងប្រទេសកម្ពុជាផងដែរ សូម្បីតែដីសាលារៀន និងដីវត្ត ដែលកន្លងមកនៅមានបញ្ហាមិនដាច់ស្រេច ព្រោះថាសាលារៀនខ្លះមានទីតាំងនៅក្នុងវត្ត ដូច្នេះមិនអាចវែកញែកឱ្យដាច់ថា ជាដីរបស់វត្ត ឬដីរបស់សាលារៀន។ មួយវិញទៀត ការចុះបញ្ជីដីធ្លីក៏អាចកំណត់ថាដីណាជាប្រភេទដីកសិកម្ម ហើយដីណាជាប្រភេទដីសម្រាប់លំនៅឋាន និងឧស្សាហកម្មដែរ ។ សម្រាប់ការចុះបញ្ជីដីធ្លីនេះដែរ ក្រសួងនឹងជំរុញឱ្យបញ្ចប់ទាំង៧លានក្បាលដីនៅត្រឹមឆ្នាំ ២០៣០ខាងមុខនេះ ។
ថ្មីៗនេះដែរ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថា ក្នុងការងារចុះបញ្ជីដីធ្លីនេះ រដ្ឋត្រូវថវិកាប្រមាណ១១០លានដុល្លារអាមេរិក ដើម្បីបញ្ចប់ការវាស់វែង និងចុះបញ្ជីដីធ្លីដែលនៅសេសសល់ចំនួន៥លានក្បាលដីទៀត ។ ការចុះបញ្ជីដីធ្លីនេះដែរ នឹងអាចបញ្ចប់បញ្ហាវិវាទដែលកើតឡើងកន្លងមកឱ្យដាច់ស្រលះ ហើយក៏គ្រប់គ្រង និងរៀបចំការងារសុរិយោដីបានល្អប្រសើរផងដែរ ។
គួរបញ្ជាក់ថា គិតត្រឹមចុងខែមិថុនា ឆ្នាំ២០២៤ ក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ចប់ករណីវិវាទដីធ្លីដែលសេសសល់កន្លងមក បានចំនួន ១៣ ៣២៩ ករណី លើ ១៥ ៦៤២ករណី ស្មើនឹង ៨៥,២១ភាគរយ ។ ការដោះស្រាយបញ្ចប់វិវាទទាំងនេះត្រូវបានអនុវត្តក្នុងយន្តការដែលមានស្រាប់ រួមមាន គណៈកម្មាការសុរិយោដី អាជ្ញាធរជាតិដោះស្រាយទំនាស់ដីធ្លី និងក្រុមការងារដោះស្រាយទំនាស់ដីធ្លី ដោយឈរលើគោលការណ៍ឈ្នះឈ្នះ ដោយតម្រូវឱ្យគ្រប់ភាគីពាក់ព័ន្ធចូលរួម សហការ បន្ថយទំហំ សម្រួលព្រំ ប្តូរទីតាំង និងទទួលបានបណ្ណកម្មសិទ្ធិ ៕
