(ភ្នំពេញ)៖ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចាត់ទុកស្មារតីប្រជាជន មហាជន និងបក្ស ថាពិតជាសំខាន់ណាស់សម្រាប់អ្នកបន្តវេនដឹកនាំ និងធ្វើឱ្យប្រទេសជាតិកម្ពុជាកាន់តែរឹងមាំ។ នេះជាការថ្លែងនៅក្នុងជំនួបសវនាការការងារជាមួយឯកឧត្តម អ៊ុ សារឹទ្ឋ ប្រធានគណៈកម្មការទី៩នៃព្រឹទ្ធសភា នាព្រឹកថ្ងៃទី១៣ ខែកុម្ភៈ ឆ្នាំ២០២៥ នៅទីស្តីការក្រសួង។
ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា នាដើមអាណត្តិទី៧នេះ កិច្ចការទី១ ដែលឯកឧត្តមឧបនាយករដ្ឋមន្ត្រី ត្រូវអនុវត្តនោះគឺការបន្តនិរន្តរភាពការងារស្ថាប័ន ដោយធ្វើយ៉ាងណារក្សាដំណើរការស្ថាប័ននេះឱ្យបានល្អដែលនេះជាចំណុចមួយដើម្បីកសាងនូវជំនឿទុកចិត្តទាំងមន្ត្រីនៅក្នុងក្រសួងនិងថ្នាក់ដឹកនាំរាជរដ្ឋាភិបាលដែលបានផ្ដល់សេចក្តីទុកចិត្តមកឱ្យ, ត្រូវរក្សាស្មារតីនិងសតិអារម្មណ៍ឱ្យបាននឹងនរក្នុងការបំពេញការងារ, រក្សាសាមគ្គីភាពនិងឯកភាពផ្ទៃក្នុងរបស់ក្រសួង, កសាងជំនឿនិងទំនុកចិត្តលើការដឹកនាំ។
ចំពោះកិច្ចការទី២ ត្រូវចូលរួមធ្វើឱ្យសង្គមមានស្ថិរភាពច្រើនជាងមុននិងបង្កើតបរិយាកាសគ្មានវិវាទដោយឯកឧត្តម ចង់ប្រែក្លាយកម្ពុជាពីប្រទេសមួយដែលទទួលបានឯករាជ្យ សន្តិភាពនិងបន្តក្លាយជាប្រទេសងាយស្រួលរស់នៅនិងមិនមានបញ្ហាវិវាទ ហៅថាសហសម័យកម្ពុជា ដែលទាំងនេះគឺជាដំណើរការនៃការកសាងជាតិកម្ពុជាឡើងវិញ។ ការចុះបញ្ជីដីធ្លីបង្ហើយគឺជាចំណុចសំខាន់ក្នុងការបង្កើតបរិយាកាសគ្មានវិវាទ ដោយមកទល់ពេលនេះយើងចុះបញ្ជីដីធ្លីបានចំនួន ៤ លានក្បាលដីបន្ថែមទៀត ដោយនៅសល់ប្រមាណជាង ៥០ ម៉ឺនក្បាលដីទៀតប៉ុណ្ណោះនឹងត្រូវបញ្ចប់ការចុះបញ្ជីដីនៅមុនពិធីបុណ្យចូលឆ្នាំថ្មីប្រពៃណីជាតិមកដល់។
ចំពោះការដោះស្រាយវិវាទដីធ្លីតាមរយះគណៈកម្មការសុរិយោដី អាជ្ញាធរជាតិដោះស្រាយវិវាទដីធ្លី អង្គការសង្គមស៊ីវិល និងតាមការចូលរួមរបស់ប្រជាពលរដ្ឋ ហើយការដោះស្រាយវិវាទដីធ្លីបច្ចុប្បន្ននេះគឺនៅសល់ត្រឹមតែក្រោម១ពាន់ករណីប៉ុណ្ណោះ ដោយមិនមានភាពរសើបផ្នែកនយោបាយនិងសេដ្ឋកិច្ចនោះឡើយ។ ចំពោះសេវាគាប់ចិត្តគឺក្រសួងបានផ្ដល់សេវាសុរិយោដីនិងសេវាសំណង់ឱ្យប្រជាពលរដ្ឋងាយស្រួលប្រើប្រាស់តាមរយៈប្រព័ន្ធអនឡាញដែលអាចប្រើប្រាស់នៅទីណាពេលណាក៏បាន។
រីឯបញ្ហាបឹងទន្លេសាប គឺយើងមានគោលការណ៍ច្បាស់លាស់ក្នុងការរក្សាអាយុជីវិតបឹងទន្លេសាប ដោយក្នុងនោះបានកំណត់ជាតំបន់១ តំបន់២ និងតំបន់៣ និងបង្កើតជម្រើសមុខរបរសម្រាប់ប្រជាពលរដ្ឋនៅតំបន់បឹងទន្លេសាប។ ដោយឡែកនៅខេត្តសៀមរាប យើងបានផ្លាស់ប្ដូរលក្ខខណ្ឌនៃការប្រើប្រាស់ដីនៅតំបន់អង្គរដែលជាគន្លឹះដោះស្រាយបញ្ចប់បញ្ហាវិវាទទាំងស្រុងរវាងអាជ្ញាធរជាតិអប្សរានិងប្រជាពលរដ្ឋ១១៤ ភូមិស្មើនឹង ១៧ម៉ឺននាក់។
រីឯបញ្ហាបុរី យើងទទួលបានករណីវិវាទដែលត្រូវដោះស្រាយរហូតដល់ ១២៩គម្រោងដោយក្នុងនោះយើងបានដោះស្រាយវិវាទរវាងម្ចាស់បុរីនិងអតិថិជនបានជិត១០០ គម្រោងហើយ។ ជាមួយនេះអត្រាការប្រាក់ក្នុងការទិញលំនៅឋានក៏ជាចំណុចយុទ្ធសាស្ត្ររបស់សង្គមជាតិដែរ ដូច្នេះឯកឧត្តមបានធ្វើការជាមួយធនាគារនិងមីក្រូហិរញ្ញវត្ថុដើម្បីកែសម្រួលលើអត្រាការប្រាក់នេះអោយបានសមរម្យឡើងវិញ ហើយឯកឧត្តមក៏បានធ្វើការជាមួយលោកជំទាវ ជា សិរី ទេសាភិបាលធនាគារជាតិនៃកម្ពុជាដើម្បីបញ្ចេញសាច់ប្រាក់ជាប្រាក់រៀលដើម្បីផ្ដល់កម្ចីទិញផ្ទះ ដែលអត្រាការប្រាក់អាចមានកម្រិតទាបនិងដើម្បីរក្សាលំនឹងនៃប្រាក់រៀល។ ចំពោះអគារដែលមានសភាពចាស់ទ្រុឌទ្រោមនិងសំណង់មិនរៀបរយ យើងបានសម្របសម្រួលជាមួយប្រជាពលរដ្ឋដែលរស់នៅក្នុងអគារទាំងនោះដើម្បីផ្ដល់ជម្រើសផ្លាស់ប្ដូរទីតាំងចាកចេញពីអគារទាំងនេះដើម្បីរក្សាសុវត្ថិភាព ចៀសផុតពីការបង្កហានិភ័យដល់អាយុជីវិត និងចៀសផុតពីការបៀតបៀន គ្រឿងញៀននិងអំពើហឹង្សាផ្សេងៗ។
ជាការឆ្លើយតប ឯកឧត្តម អ៊ុ សារឹទ្ធ ប្រធានគណៈកម្មការទី៩ នៃព្រឹទ្ធសភា បានថ្លែងអំណរគុណដល់ឯកឧត្តមឧបនាយករដ្ឋមន្ត្រី សាយ សំអាល់ ដែលបានផ្ដល់ឱកាសដល់គណៈកម្មការទី៩ នៃព្រឹទ្ធសភាបានមកទទួលព័ត៌មានដោយផ្ទាល់អំពីសមិទ្ធផល បញ្ហាប្រឈម និងទិសដៅខាងមុខរបស់ក្រសួងដែលកំពុងធ្វើជាសេនាធិការដ៏សកម្មរបស់រាជរដ្ឋាភិបាលក្នុងវិស័យដីធ្លី សំណង់ និងនគរូបនីយកម្ម សំដៅផ្តល់ឧត្តមប្រយោជន៍ជូនជាតិនិងប្រជាជន៕
