ភ្នំពេញ ៖ សម្រាប់កិច្ចដំណើរការនៅក្នុងការដ្ឋាន ឬសាងសង់អ្វីមួយ ច្បាប់តម្រូវឱ្យមានការស្នើសុំលិខិតអនុញ្ញាតសាងសង់ជាមុនសិន ដើម្បីធានាដល់ការសាងសង់មិនបង្កនូវបញ្ហា ឬគ្រោះថ្នាក់ណាមួយជាយថាហេតុ ដូច្នេះហើយម្ចាស់សំណង់ ម្ចាស់ការដ្ឋានត្រូវយល់ដឹងពីច្បាប់ និងត្រូវអនុវត្តទៅតាមច្បាប់នៃព្រះរាជាណាចក្រកម្ពុជា ។
យោងតាមអនុក្រឹត្យលេខ ៨៦ អនក្រ.បក ស្តីពីលិខិតអនុញ្ញាតសាងសង់របស់រាជរដ្ឋាភិបាលនៃព្រះរាជាណាចក្រកម្ពុជា ចុះថ្ងៃទី១៩ ខែធ្នូ ឆ្នាំ១៩៩៧ សំណង់ដែលតម្រូវឱ្យមានលិខិតអនុញ្ញាតសាងសង់ជាមុន គឺរាល់ការសាងសង់ថ្មី ឬសាងសង់ឡើងវិញលើអគារដែលមានស្រាប់ (ក្នុងករណីដែលការសាងសង់ឡើងវិញនោះប្តូរទ្រង់ទ្រាយ ឬទិដ្ឋភាពនៃសំណង់) នៅក្នុងទីក្រុង និងទីប្រជុំជន។
ចំណែកឯសំណង់ជាលំនៅដ្ឋានរបស់ប្រជាពលរដ្ឋដែលស្ថិតនៅទីជនបទ ឬតំបន់ឆ្ងាយពីផ្លូវជាតិ ផ្លូវដែក និងឆ្ងាយពីតំបន់រមណីយដ្ឋានទេសចរណ៍ តំបន់បេតិកភណ្ឌ ឬតំបន់រក្សាទុកការពារ គឺមិនតម្រូវឱ្យមានលិខិតអនុញ្ញាតសាងសង់ឡើយ ។ លិខិតអនុញ្ញាតសាងសង់ ត្រូវតម្រូវឱ្យស្នើសុំដោយម្ចាស់គម្រោង ឬអ្នកតំណាងស្របច្បាប់របស់ម្ចាស់គម្រោង។ ខាងក្រោមនេះជានីតិវិធីនៃការស្នើសុំលិខិតអនុញ្ញាតសាងសង់៖
មាត្រា៩ ស្តីពីលិខិតអនុញ្ញាតសាងសង់ បានចែងអំពីឯកសារចាំបាច់សម្រាប់ការស្នើសុំដូចខាងក្រោម៖
១. វិញ្ញាបនបត្រសម្គាល់ម្ចាស់អចលនវត្ថុ ឬលិខិតកាន់កាប់ដីជាបណ្តោះអាសន្ន
២. សាលាកបត្រដីឡូតិ៍ និងប្លង់ទីតាំងអគារនៅក្នុងដីឡូតិ៍
៣. ប្លង់ និងគម្រោងស្ថាបត្យកម្មវិស្វកម្ម
៤. អត្តសញ្ញាណប័ណ្ណសម្គាល់ជាជនជាតិខ្មែររបស់អ្នកស្នើសុំ
៥. ពាក្យសុំលិខិតអនុញ្ញាតសាងសង់ដោយមានហត្ថលេខារបស់ម្ចាស់ដី និងអ្នកធ្វើគម្រោង។ (សំណុំលិខិតពាក្យសុំលិខិតអនុញ្ញាតសាងសង់ទាំងអស់ត្រូវធ្វើឡើងជាភាសាខ្មែរ ហើយអត្ថបទជាភាសាអង់គ្លេស និងភាសាបារាំងអាចផ្តល់ភ្ជាប់ជាមួយនឹងលិខិតនេះបាន) ។
អាជ្ញាធរដែលមានសមត្ថកិច្ចក្នុងការចេញលិខិតអនុញ្ញាតសាងសង់មានចំនួន ០៣ថ្នាក់។ ទី១៖ ក្រុង ខណ្ឌ ស្រុក ចំពោះសំណង់ដែលមានផ្ទៃក្រឡាកម្រាលសំណង់សរុបតូចជាង ឬស្មើ៥០០ម៉ែត្រការ៉េ។ ទី២៖ គឺថ្នាក់រាជធានី ខេត្ត ចំពោះសំណង់ដែលមានផ្ទៃក្រឡាកម្រាលសំណង់ធំជាង ៥០០ ម៉ែត្រការ៉េ ដល់៣០០០ ម៉ែត្រការ៉េ។ ទី៣៖ គម្រោងសាងសង់ដែលមានផ្ទៃក្រឡាកម្រាលសំណង់ធំជាង ៣០០០ម៉ែត្រការ៉េ ត្រូវមកសុំការអនុញ្ញាត្តសាងសង់នៅក្រសួងរៀបចំដែនដី នគរូបនីយកម្ម និងសំណង់ផ្ទាល់តែម្តង។
យោងតាមអនុក្រឹត្យខាងលើ រយៈពេលសម្រាប់ពិនិត្យសំណុំលិខិតអនុញ្ញាតសាងសង់ ត្រូវបានកំណត់ត្រឹម ៤៥ថ្ងៃនៃថ្ងៃធ្វើការ ។ រយៈពេលនេះ គិតចាប់ពីថ្ងៃដែលរាល់លិខិតស្នាម ភ្ជាប់ជាមួយនឹងពាក្យសុំលិខិតអនុញ្ញាតសាងសង់បានបំពេញសព្វគ្រប់ ។ នៅចុងរយៈពេលកំណត់នេះ អ្នកស្នើសុំនឹងទទួលបានដំណឹងអំពីសេចក្តីសម្រេចជាលាយលក្ខអក្សរ ស្តីពី ការអនុញ្ញាត ការមិនអនុញ្ញាត ឬការអនុញ្ញាតដែរតែស្នើសុំឱ្យកែសម្រួលបន្ថែម។
ស្របគ្នានេះដែរ បងប្អូនប្រជាពលរដ្ឋទាំងអស់គួរគប្បីស្វែងយល់ និងអនុវត្តឱ្យបានខ្ជាប់ខ្ជួនទៅតាមនីតិវិធីខាងលើ ដោយហេតុថា រាល់សំណង់ដែលបានចាប់ផ្តើមដោយមិនមានលិខិតអនុញ្ញាតសាងសង់ពីអាជ្ញាធរមានសមត្ថកិច្ចនឹងត្រូវចាត់ទុកជាបទល្មើស ហើយការដ្ឋានសាងសង់នឹងត្រូវបានបញ្ឈប់ជាបន្ទាន់។
លើសពីនេះ បុគ្គលដែលបានប្រព្រឹត្តល្មើសនឹងបទបញ្ជារបស់មន្រ្តីមានសមត្ថកិច្ចនឹងត្រូវជាប់ចោទហើយឧបករណ៍ទាំងអស់នៅក្នុងការដ្ឋាននឹងត្រូវបានរឹបអូស និងអាចរងការពិន័យអន្តរការណ៍ថែមទៀតផង។ (យោងតាមមាត្រា២៤ នៃអនុក្រឹត្យលេខ៨៦ អនក្រ.បក ស្តីពីលិខិតអនុញ្ញាតសាងសង់ចុះថ្ងៃទី១៩ ខែធ្នូ ឆ្នាំ១៩៩៧ និងយោងតាមប្រកាសអន្តរក្រសួងស្តីពី នីតិវិធីនិងបែបបទនៃការធ្វើអធិការកិច្ចសំណង់លេខ ១១៨ប្រក/ដ.ន.ស.កយ ចុះថ្ងៃទី០២ ខែសីហា ឆ្នាំ២០១៩)៕