ភ្នំពេញ ៖ ដើម្បីងាយស្រួលក្នុងការរៀបចំនគរូបនីយកម្មឱ្យបានកាន់តែមានប្រសិទ្ធភាពខ្ពស់ ទាក់ទាញការវិនិយោគ និងអភិវឌ្ឍន៍ទៅតាមតំបន់នីមួយៗ ក្រសួងរៀបចំដែនដី នគរូបនីយកម្ម និងសំណង់ដែលជាសេនាធិការរបស់រាជរដ្ឋាភិបាលកម្ពុជា បានបែងចែកជាតំបន់ប៉ូលសេដ្ឋកិច្ច និងរបៀងសេដ្ឋកិច្ចចំនួន៨នៅឆ្នាំ២០២៣ និងបានកាត់មកនៅត្រឹម៧តំបន់ប៉ូលវិញ ។
តាមរយៈរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា តំបន់ប៉ូលសេដ្ឋកិច្ចទាំង៧នោះរួមមាន តំបន់ប៉ូលទី១ គឺនៅរាជធានីភ្នំពេញ, តំបន់ប៉ូលទី២ គ្រប់ដណ្ដប់លើខេត្តទាំង៤ ជាប់ឆ្នេរសមុទ្រកម្ពុជា រួមមានខេត្តព្រះសីហនុ កោះកុង កំពត និងខេត្តកែប, តំបន់ប៉ូលទី៣ គ្រប់ដណ្ដប់លើខេត្តសៀមរាប ព្រះវិហារ និងខេត្តឧត្តរមានជ័យ ។ ចំណែកខេត្តបាត់ដំបង ខេត្តពោធិ៍សាត់ បន្ទាយមានជ័យ និងខេត្តប៉ៃលិន ត្រូវបានចាត់បញ្ចូលជាតំបន់ប៉ូលសេដ្ឋកិច្ច និងរបៀងសេដ្ឋកិច្ចទី៤ ។
សម្រាប់តំបន់ប៉ូលទី៥ បានគ្រប់ដណ្ដប់លើខេត្តទាំង៤ ក្នុងភូមិភាគឦសានរួមមាន ខេត្តមណ្ឌលគិរី , រតនគិរី , ស្ទឹងត្រែង និងខេត្តក្រចេះ ។ តំបន់ប៉ូលទី៦ រួមមាន ខេត្តកណ្ដាល, តាកែវ, កំពង់ស្ពឺ និងខេត្តកំពង់ឆ្នាំង ហើយប៉ូលទី៧ គ្របដណ្ដប់លើខេត្តកំពង់ចាម, កំពង់ធំ និងខេត្តត្បូងឃ្មុំ ។ ដោយឡែក ខេត្តចំនួន២ ផ្សេងទៀត រួមមានខេត្តស្វាយរៀង និងខេត្តព្រៃវែង ត្រូវបានចាត់បញ្ចូលជាតំបន់ទី៨ ។
ឯកឧត្តម សៅ សុភាព រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានប្រាប់ឱ្យដឹងថា នៅអំឡុងខែសីហា ឆ្នាំ២០២៤ ក្រសួងរៀបចំដែនដី នគរូបនីយកម្ម និងសំណង់ បានជ្រើសរើសទីប្រឹក្សាបច្ចេកទេសជាតិចំនួន៤ ដើម្បីជួយគាំទ្រការងារបច្ចេកទេសសម្រាប់ការរៀបចំផែនការលើការរៀបចំដែនដីថ្នាក់ជាតិ អភិវឌ្ឍន៍តំបន់ប៉ូល និងរបៀងសេដ្ឋកិច្ច ។ បន្ថែមពីលើនេះ ដោយមានការចូលរួមមតិយោបល់ពីក្រុមការងារក្រុមទីប្រឹក្សាបច្ចេកទេសជាតិ ក៏ដូចជាអ្នកពាក់ព័ន្ធ ក្រុមការងារបានពិនិត្យឡើងវិញលើការបែងចែកតំបន់ប៉ូលសេដ្ឋកិច្ច និងកែសម្រួលមកនៅត្រឹម ៧តំបន់ប៉ូលសេដ្ឋកិច្ចវិញ ។
សម្រាប់តំបន់ប៉ូលសេដ្ឋកិច្ចទាំង៧ ដែលត្រូវបានក្រសួងកំណត់សារជាថ្មី គឺផ្អែកទៅលើភាពសមស្របនៃសក្ដានុពលតាមតំបន់ កត្តាប្រជាសាស្ត្រ កត្តាភូមិសាស្ត្រ ស្ថានភាពសេដ្ឋកិច្ច-សង្គម បរិស្ថាន ធនធានធម្មជាតិ និងវប្បធម៌ ។ ការបែងចែកតំបន់ថ្មីនេះរួមានតំបន់ប៉ូលទី១ គឺរាជធានីភ្នំពេញ, ទី២ មានខេត្តកណ្តាល, តាកែវ, កំពង់ស្ពឺ និងខេត្តកំពង់ឆ្នាំង, ទី៣ ខេត្តជាប់តំបន់សមុទ្រទាំង៤, ទី៤ រួមមានខេត្តខេត្តបាត់ដំបង, ពោធិ៍សាត់, បន្ទាយមានជ័យ និងខេត្តប៉ៃលិន, ទី៥ ខេត្តក្នុងតំបន់វប្បធម៌ រួមមាន ខេត្តសៀមរាប, ព្រះវិហារ, កំពង់ធំ និងឧត្តរមានជ័យ, ទី៦ ខេត្តទាំង៤ ក្នុងភូមិភាគឦសាន និងទី៧ រួមមានខេត្តកំពង់ចាម, ត្បូងឃ្មុំ, ព្រៃវែង និងខេត្តស្វាយរៀង ៕