ភ្នំពេញ ៖ បើទោះជានាពេលបច្ចុប្បន្ន ទីផ្សារខុនដូរហាក់ត្រូវបានជាប់គាំងអូសបន្លាយមកតាំងពីដើមឆ្នាំ២០២០មកម្ល៉េះក៏ដោយ ក៏គម្រោងខុនដូរមួយចំនួនទៀតនៅតែបន្តមានសកម្មភាពសាងសង់ដើម្បីអាចបញ្ចប់តាមផែនការរបស់ខ្លួន។ ជាក់ស្ដែង នៅក្នុងឆ្នាំ២០២៤នេះ គេរំពឹងថា មានគម្រោងខុនដូរបែបប្រណិតចំនួន៤ទៀត ដែលនឹងបញ្ចប់ការសាងសង់ទាំងស្រុង ហើយចំណែកបញ្ចូលទៅក្នុងទីផ្សារប្រមាណ២៥០០យូនីតបន្ថែមទៀត។
បើតាមរបាយការណ៍របស់ក្រុមហ៊ុន CBRE Cambodia បានឱ្យដឹងថា គម្រោងខុនដូទាំង៤ ដែលគ្រោងនឹងបញ្ចប់ការសាងសង់ទាំងស្រុងនៅក្នុងឆ្នាំ២០២៤នេះ រួមមាន ១.គម្រោងRoyal Platinum មានទីតាំងនៅខណ្ឌទួលគោក ២.គម្រោងខុនដូ TV Tower One មានទីតាំងនៅខណ្ឌឬស្សីកែវ ៣.គម្រោងខុនដូ City View Residence នៅខណ្ឌដូនពេញ និង ៤. គម្រោងខុនដូ Vue Aston នៅខណ្ឌច្បារអំពៅ ។
តាមរយៈគម្រោងខុនដូទាំង ៤ នេះ នឹងធ្វើឱ្យទីផ្សារខុនដូនក្នុងប្រទេសកម្ពុជា ជាពិសេសនៅរាជធានីភ្នំពេញនឹងមានការកើនឡើងមួយកម្រិតទៀត ។ ជាក់ស្ដែងគម្រោងខុនដូ Royal Platinum កម្រិតផ្កាយ៥ មានកម្ពស់ ២៨ជាន់ ដែលទើបនឹងសម្ពោធកាលពីពេលថ្មីៗនេះ មានបន្ទប់ហូតដល់ ៨៥១យូនីតឯណោះស្ថិតក្នុងទឹកដីខណ្ឌទួលគោក ។
ចំណែកគម្រោងខុនដូ TV Tower One មានកម្ពស់២៩ជាន់ មានបន្ទប់ខុដូចំនួន២៥៣យូនីត ស្ថិតនៅសង្កាត់គីឡូម៉ែត្រលេខ ៦ ខណ្ឌឬស្សីកែវ រាជធានីភ្នំពេញ ។ គម្រោងនេះរំពឹងថានឹងបញ្ចប់ទាំងស្រុងនៅក្នុងឆ្នាំ២០២៤ ។
គម្រោង City View Residence ស្ថិតនៅក្នុងខណ្ឌដូនពេញ អភិវឌ្ឍន៍ដោយក្រុមហ៊ុន Hua Jun Property Development Co.,Ltd ។ គម្រោងនេះ ជាគម្រោងអគារការិយាល័យ និងខុនដូ ដោយមានបន្ទប់សរុបចំនួន៤៨០យូនីត ក្នុងនោះ ការិយាល័យមានចំនួន២៨៨ និងខុនដូមានចំនួន២៥២យូនីត ។
ដោយឡែក គម្រោងអភិវឌ្ឍន៍អគារខុនដូមួយទៀតដែលរំពឹងថានឹងបញ្ចប់ក្នុងឆ្នាំ២០២៤នេះដែរ គឺគម្រោង Vue Aston ជាគម្រោងខុនដូដែលអភិវឌ្ឍន៍នៅក្នុងទឹកដីនៃខណ្ឌច្បារអំពៅ ជាប់មាត់ទន្លេបាសាក ។ គម្រោងនេះ មានកំពស់៣៨ជាន់ និងមានចំនួន ៨៩៥យូនីត ។
អ្នកនាង គឹម គិនកេសា នាយិកាប្រតិបត្តិក្រុមហ៊ុន CBRE Cambodia បានលើកឡើងថា ក្នុងឆ្នាំ២០២៤នេះ គម្រោងបើកថ្មីនៅក្នុងរាជធានីភ្នំពេញ មិនសូវជាមានច្រើនទេ ប៉ុន្តែគម្រោងដែលបានបើកការដ្ឋានកាលពីប៉ុន្មានឆ្នាំមុន និងបានផ្អាកដំណើរការមួយរយៈកាលពីអំឡុងវិបត្តិកូវីដ១៩ក៏បានចាប់ផ្ដើមដំណើរការសាងសង់ឡើងវិញ ។
អ្នកបន្តបានបញ្ជាក់ថា បច្ចុប្បន្ននេះ សម្រាប់ទីផ្សារខុនដូ ការលក់គម្រោងទាំងត្រៀមបញ្ចប់សាងសង់ និងគម្រោងបញ្ចប់ការសាងសង់រួចរាល់ទាំងស្រុងគឺមានច្រើនជាងអ្នកទិញ មានន័យថា ការផ្គត់ផ្គង់ក្នុងទីផ្សារមួយនេះបាន និងកំពុងលើសតម្រូវការប្រើប្រាស់ ដូច្នេះហើយអ្នកកាន់ចំណែកនៃទីផ្សារលក់បានបង្កើតកម្មវិធី ក៏ដូចជាវិធីសាស្ត្រជាច្រើនដើម្បីជំរុញការលក់ ខណៈដែលអ្នកទិញក៏មានជម្រើសច្រើន និងអាចទិញបានក្នុងតម្លៃសមរម្យ ឬទាបជាងតម្លៃទីផ្សារមុនពេលមានវិបត្តិកូវីដ-១៩ ៕
