ភ្នំពេញ ៖ យោងតាមរបាយការណ៍របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានបង្ហាញថា នៅក្នុងឆ្នាំ ២០២៤ សួនឧស្សាហកម្មដែលមានរោងចក្រកំពុងដំណើរការ មានចំនួន ២០ទីតាំង ស្ថិតនៅក្នុង ៥ រាជធានី./ខេត្ត។ ចំនួននេះមានការកើនឡើងចំនួន ៥ទីតាំង ស្មើនឹង១៧,៦៥ភាគរយ ធៀបនឹងឆ្នាំ២០២៣។
ក្នុងចំណោមសួនទាំង២០ ទីតាំង មាននៅខេត្តកណ្តាលមានចំនួន៧ រាជធានីភ្នំពេញចំនួន៦ កំពង់ស្ពឺ៥ បន្ទាយមានជ័យ១ និងខេត្តតាកែវចំនួន១។
របាយការណ៍ក្រសួងឧស្សាហកម្ម បានឱ្យដឹងទៀតថា៖ ពីឆ្នាំ២០២០ មកដល់ ឆ្នាំ២០២៤ កើនឡើងដល់ ១៣សួនឧស្សាហកម្ម ខណៈដែលនៅក្នុងឆ្នាំ២០២០ មាន១០ទីតាំង, ឆ្នាំ២០២១ មាន១៣ ទីតាំង, ឆ្នាំ២០២២ មាន១៤ទីតាំង ,ឆ្នាំ២០២៣ មាន១៧ ទីតាំង ហើយឆ្នាំ២០២៤ បានកើនឡើងរហូតដល់ ២០ទីតាំង។
គួរបញ្ជាក់ថា៖ ស្ថិតក្នុងយុទ្ធសាស្ត្របញ្ចកោណដំណាក់កាលទី២របស់រាជរដ្ឋាភិបាល ការពង្រឹងប្រសិទ្ធភាព និងភាពទាក់ទាញនៃតំបន់សេដ្ឋកិច្ចពិសេស រួមបញ្ចូលនូវសួនឧស្សាហកម្ម សួនកសិ-ឧស្សាហកម្ម និង តំបន់ពាណិជ្ជកម្មសេរី (Free-Trade Zone) ដែលមានគោលដៅយុទ្ធសាស្ត្រផ្តោតលើការប្រមូលផ្តុំ និងការអភិវឌ្ឍបណ្ដាញផលិតកម្មឱ្យដើរតួនាទីសំខាន់ក្នុងការបង្កើនប្រសិទ្ធភាព និងភាពប្រកួតប្រជែង ឧស្សាហកម្មកម្ពុជា។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ធ្លាប់បានលើកឡើងថា៖ ការបង្កើតសួនឧស្សាហកម្មគឺសំដៅបង្កើនភាពទាក់ទាញការវិនិយោគផ្ទាល់ពីបរទេស និងក្នុងស្រុក លើកកម្ពស់ផលិតកម្ម និងការកែច្នៃសម្រាប់នាំចេញ ជាពិសេសគាំទ្រដល់ការបង្កើតការងារ៕