ភ្នំពេញ ៖ នៅដើមឆ្នាំ២០២៥ វិនិយោគិនចិននៅតែបន្តឈរលំដាប់កំពូលជាវិនិយោគិនដែលបោះទុនវិនិយោគនៅកម្ពុជាច្រើនជាងគេ។ ជាក់ស្ដែងរយៈពេល ២ខែដំបូងនៃឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគចំនួន ១១២គម្រោង មានទុនវិនិយោគសរុបជាង ១ពាន់លានដុល្លារអាមេរិក ដោយក្នុងនោះ ប្រភពទុនមកពីប្រទេសចិនមានប្រមាណ៨០ភាគរយ ឬជាង៨០០លានដុល្លារអាមេរិកទៅហើយ ។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ក្រោយជំនួបរវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងគណៈប្រតិភូនៃមន្ទីរកិច្ចការបរទេសនៃខេត្តជាំង ស៊ូ ប្រទេសចិន បានឱ្យដឹងថា ក្នុងរយៈពេល២ខែ ដើមឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន ១១២ ក្នុងទុនវិនិយោគប្រមាណជាង ១ពាន់លានដុល្លារអាមេរិក ហើយការវិនិយោគមកពីប្រទេសចិនបានរួមចំណែកដល់ទៅប្រមាណជិត ៨០ភាគរយ នៃទុនវិនិយោគសរុប ។
ជាមួយគ្នានេះដែរ ឯកឧត្តមអគ្គលេធិការក៏បានស្នើឱ្យខេត្តជាំងស៊ូធ្វើការគិតគូរក្នុងការបង្កើតតំបន់កសិ-ឧស្សាហកម្មមួយដើម្បីផលិតវត្ថុធាតុដើម ឬផលិតផលពាក់កណ្តាលសម្រេច សម្រាប់ផ្គត់ផ្គង់ដល់ឧស្សាហកម្មក្នុងស្រុកដែលផលិតសម្រាប់ធ្វើការនាំចេញ ពិសេសឧស្សាហកម្មផលិតគ្រឿងសង្ហារិម និងឧស្សាហកម្មផលិតសំបកកង់រថយន្ត ដោយហេតុថាកម្ពុជាមានធនធានធម្មជាតិគ្រប់គ្រាន់ ប៉ុន្តែបច្ចេកវិទ្យាសម្រាប់ធ្វើការផលិត ឬកែច្នៃនៅមានកម្រិតនៅឡើយ ។
ឯកឧត្តម ក៏បានថ្លែងអំណរគុណដល់រដ្ឋបាលខេត្តជាំងស៊ូ ដែលជារឿយៗតែងតែជំរុញវិនិយោគិននៅក្នុងខេត្តមកបណ្តាក់ទុនវិនិយោគនៅកម្ពុជា។ ជាក់ស្តែង តំបន់សេដ្ឋកិច្ចពិសេសក្រុងព្រះសីហនុគឺជាសក្ខីភាពដ៏អស្ចារ្យមួយដែលបច្ចុប្បន្នតំបន់សេដ្ឋកិច្ចពិសេសនេះមានក្រុមហ៊ុនវិនិយោគរហូតដល់ទៅប្រមាណជិត២០០ ហើយក៏មានការបណ្តាក់ទុនវិនិយោគបង្កើតតំបន់សេដ្ឋកិច្ចពិសេសមួយទៀតស្ថិតនៅក្នុងភូមិសាស្ត្រខេត្តកំពង់ចាម ដែលជាប្រភពទុនវិនិយោគមកពីខេត្តជាំងស៊ូ ផងដែរ ។
ឯកឧត្តមអគ្គលេខាធិការក៏បានគូសបញ្ជាក់ពីស្ថានភាពវិនិយោគនៅកម្ពុជាដែលមានកំណើនពីមួយឆ្នាំទៅមួយឆ្នាំ ជាពិសេសប្រភពទុនវិនិយោគមកពីប្រទេសចិនបានឈរនៅលំដាប់លេខរៀងទីមួយ ឬទី២ជាបន្តបន្ទាប់ក្នុងរយៈពេលជាង១ទសវត្សរ៍ចុងក្រោយ ។
ទន្ទឹមនឹងការវិនិយោគពីប្រទេសចិននៅតែមានកំណើនខ្ពស់ រាជរដ្ឋាភិបាលកម្ពុជាក៏បានបន្តទាក់ទាញវិនិយោគិនចិនបន្ថែមទៀតចូលមកបណ្ដាក់ទុនវិនិយោគនៅកម្ពុជា ជាក់ស្ដែងនៅរយៈពេលប៉ុន្មានថ្ងៃមុននេះឯកឧត្តមស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំវិនិយោគិនកម្ពុជានិងមន្ត្រីសំខាន់ៗទៅទស្សនកិច្ចនៅប្រទេសចិន ដើម្បីផ្សព្វផ្សាយនិងទាក់ទាញវិនិយោគិនចិនចូលមកកម្ពុជាបន្ថែម ។
គួរបញ្ជាក់ថា កាលពីឆ្នាំ២០២៤កន្លងទៅកម្ពុជា អនុម័តគម្រោងវិនិយោគសរុបចំនួន៤១៤គម្រោង ដែលមានទឹកប្រាក់វិនិយោគប្រមាណ៦,៩ពាន់លានដុល្លារអាមេរិក ក្នុងនោះប្រភពទុនវិនិយោគពីប្រទេសចិនមានរហូតដល់៤៩,៨២ភាគរយឯណោះ ឬប្រមាណ៣,៤៣ពាន់លានដុល្លារអាមេរិក ៕
