ភ្នំពេញ ៖ គិតមកដល់បច្ចុប្បន្ន អាកាសយានដ្ឋានអន្តរជាតិតេជោ ដែលមានទីតាំងនៅខេត្តកណ្ដាល សម្រេចបានការសាងសង់ដំណាក់កាលទី១ ប្រមាណ ៩៥% ដោយគ្រោងនឹងដាក់ឱ្យដំណើរការជាផ្លូវការនៅខែកក្កដា ឆ្នាំ២០២៥ ខាងមុខនេះ។ អាកាសយានដ្ឋាននេះ មានផ្ទៃដីប្រមាណ ២៦០០ហិកតា ដោយក្រុមហ៊ុនសាងសង់បានរៀបចំជាតំបន់ផ្សេងៗជាច្រើន ដូចជា ភូមិវប្បធម៌ ផ្ទះសេដ្ឋី ផ្ទះសម្រាប់ថ្នាក់ដឹកនាំ សួនច្បារ កន្លែងបាញ់ទឹក ។ល។
ទីធ្លាដ៏ធំទូលាយនៃអាកាសយានដ្ឋានអន្តរជាតិនេះ អាចទទួលបានភ្ញៀវជាតិ និងអន្តរជាតិ រហូតទៅដល់ ១៥លាននាក់ សម្រាប់ដំណាក់កាលទី១។ ក្រោយការសាងសង់ដំណាក់កាលទី១ បានចប់សព្វគ្រប់ នោះដំណាក់កាលទី២នឹងត្រូវបានចាប់ផ្ដើម ដោយអាចទទួលភ្ញៀវបាន ៣០លាននាក់ និងដំណាក់កាលទី៣ អាចទទួលភ្ញៀវបានរហូតទៅដល់ ៥០លាននាក់។ នេះបើតាមការបញ្ជាក់របស់លោកឧកញ៉ា ឆារស៍ វ៉ាន់ នាយកគ្រប់គ្រងក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC)។
បើតាមប្រសាសន៍របស់លោកឧកញ៉ាបានឱ្យដឹងទៀតថា រយៈពេល១ថ្ងៃអាកាសយានដ្ឋានអន្ដរជាតិតេជោ ប្រើប្រាស់កម្មកររហូតដល់ ៧០០០ នាក់ វិស្វករសរុបចំនួនជាង២០០នាក់មានជនជាតិខ្មែរភាគច្រើន និងជនជាតិបរទេស ត្រឹមតែ១០% ។ យ៉ាងណាមិញ បន្ទាប់ពីអាកាសយានដ្ឋានអន្តរជាតិតេជោនេះបើកឱ្យប្រើប្រាស់ជាផ្លូវការហើយនោះ អាកាសយានដ្ឋានអន្ដរជាតិភ្នំពេញ (ព្រលានចាស់) នឹងត្រូវបិទដំណើរការ រីឯបុគ្គលិកគ្រប់ជាន់ថ្នាក់នៅព្រលានចាស់ក៏នឹងត្រូវផ្ទេរមកបម្រើការនៅព្រលានយន្ដហោះថ្មីនេះតែម្ដង។
បើតាមលោកឧកញ៉ា ឆារស៍ វ៉ាន់ នៅក្នុងការសាងសង់ព្រលានយន្តហោះអន្តរជាតិតេជោ ដំណាក់កាលទី១ ក្រុមហ៊ុនបានចំណាយថវិកាប្រមាណជិត ២ពាន់លានដុល្លារ ដោយមិនបូកបញ្ចូលថ្លៃដីនោះទេ។ រីឯប្លង់នៃព្រលានយន្ដហោះនេះទៀតសោត គឺត្រូវបានគូសដោយជនជាតិអង់គ្លេស ដោយយកលំនាំតាមរចនាបទបែបខ្មែរ។
គួរបញ្ជាក់ផងដែរថា អាកាសយានដ្ឋានអន្ដរជាតិតេជោ បានជាប់ចំណាត់ថ្នាក់លេខ៥ នៃគម្រោងស្ថាបត្យកម្មពិភពលោក ទាំង១១ ក្នុងឆ្នាំ២០២៥ ផ្អែកលើប្រណិតភាព ការរចនាបទបែបប្រពៃណីខ្មែរ និងបរិស្ថានប្រកបទៅដោយរុក្ខជាតិបៃតងធម្មជាតិពិតៗ។
អាកាសយានដ្ឋានអន្ដរជាតិតេជោ ជាព្រលានយន្ដហោះលំដាប់ F4 អាចឲ្យយន្ដហោះខ្នាតធំចុះចតដូចជា Airbus A380 និងប្រភេទ Boeing 747 ដោយបែងចែកការសាងសង់ជា ៣ ដំណាក់កាលផ្សេងគ្នា។ ដំណាក់កាលទី១ពីគិតចាប់ពីឆ្នាំ២០២៥ ដល់ឆ្នាំ២០៣០ រីឯដំណាក់កាលទី២ និងទី៣ គិតពីឆ្នាំ ២០៣០ ទៅដល់ឆ្នាំ ២០៥០ ៕
