ភ្នំពេញ ៖ រាជរដ្ឋាភិបាលកម្ពុជា ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បានលើកឡើងថា ក្នុងគោលបំណងលើកស្ទួយជីវភាពប្រជាពលរដ្ឋ និងដើម្បីជំរុញកំណើនសេដ្ឋកិច្ចជាតិ ក្រសួងរៀបចំដែនដី នឹងរៀបចំប្លង់គោលនៃការប្រើប្រាស់ដីនៅតាមបណ្ដាខេត្តទូទាំងប្រទេស ដោយនឹងយកប្លង់គោលនៃការប្រើប្រាស់ដីនៅក្នុងខេត្តសៀមរាប និងខេត្តចំនួន៥ផ្សេងទៀតដែលនៅជុំវិញបឹងទន្លេសាប ធ្វើជាគំរូសម្រាប់ការអនុវត្ត ។
នៅក្នុងកិច្ចប្រជុំពិគ្រោះយោបល់ស្ដីពីការគ្រប់គ្រងតំបន់បឹងទន្លេសាប និងតំបន់រមណីយដ្ឋានអង្គរ នៅថ្ងៃទី២៥ ខែសីហា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ការរៀបចំប្លង់គោលនៃការប្រើប្រាស់ដីនៅខេត្តសៀមរាប និងខេត្តចំនួន ៥ទៀតនៅជុំវិញបឹងទន្លេសាបនេះ នឹងត្រូវប្រើប្រាស់ធ្វើជាគំរូសម្រាប់អនុវត្តនៅទូទាំងប្រទេសដើម្បីលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង និងជំរុញកំណើនសេដ្ឋកិច្ចជាតិ ។
ឯកឧត្តម បានស្នើសុំឱ្យអាជ្ញាធរទន្លេសាបមានការឯកភាពគ្នាក្នុងការចូលរួមអនុវត្តការងារនៅក្នុងតំបន់បឹងទន្លេសាប និងបានឱ្យដឹងថា ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ នឹងត្រូវចុះអនុវត្តការងាររៀបចំផែនការប្រើប្រាស់ដីនៅខេត្តចំនួន ៦ជុំវិញបឹងទន្លេសាប។
ឯកឧត្តមឧបនាយករដ្ឋមន្ត្រីបានបញ្ជាក់ថា ៖
«យើងមានក្រុមការងារដែលបានបែងចែកជារួមមានចំនួន ១៣១ ឃុំ ក្នុងខេត្តចំនួន ៦ ជុំវិញបឹងទន្លេសាប ដែលត្រូវរៀបចំប្លង់គោលនៃការប្រើប្រាស់ដី។ ជារួមគឺផ្ដើមចេញពីភូមិចំនួន ១១៤ ដែលពាក់ព័ន្ធក្នុងតំបន់បេតិកភណ្ឌអង្គរ និងបន្តធ្វើនៅទូទាំងខេត្តសៀមរាប ដោយត្រូវរៀបចំប្លង់គោលនៃការប្រើប្រាស់ដីឱ្យបានចប់សព្វគ្រប់នៅទូទាំងខេត្ត»។
ឯកឧត្តមឧបនាយករដ្ឋមន្ត្រី បានបន្ថែមថា ការរៀបចំប្លង់គោលនៃការប្រើប្រាស់ដីនៅខេត្តសៀមរាប និងខេត្តចំនួន ៥ទៀត នៅជុំវិញបឹងទន្លេសាបនេះ នឹងត្រូវប្រើប្រាស់ធ្វើជាគំរូសម្រាប់អនុវត្តនៅទូទាំងប្រទេស ដើម្បីលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង និងជំរុញកំណើនសេដ្ឋកិច្ចជាតិ ។ តាមរយៈការរៀបចំប្លង់គោលនៃការប្រើប្រាស់ដី រួមជាមួយការបង្កើតមូលនិធិឃុំ ក្រសួងសេដ្ឋកិច្ចនិងហិរញ្ញវត្ថុ នឹងអាចផ្តល់ថវិកាស្របតាមគម្រោងផែនការតាមឃុំនីមួយៗបាន ដែលនេះគឺជាយុទ្ធសាស្ត្រពិសេសមួយសំដៅសម្រេចបាននូវចក្ខុវិស័យរបស់រាជរដ្ឋាភិបាលកម្ពុជាឆ្នាំ ២០៣០ និងឆ្នាំ ២០៥០។
តាមរបាយការណ៍វឌ្ឍនភាពរបស់ក្រុមការងារនៃមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តសៀមរាប បានឱ្យដឹងថា តំបន់ទន្លេសាប ក្នុងដែនសមត្ថកិច្ចរបស់ខេត្តសៀមរាបមានឃុំសង្កាត់ចំនួន ៣៣, ក្រុមការងារបានរៀបចំសម្រេចចំនួន ២ឃុំ គឺឃុំពោធិ៍ទ្រាយ ស្រុកពួក និងឃុំកំពុងភ្លុក ស្រុកប្រាសាទបាគង ហើយកំពុងរៀបចំ ២ឃុំ/សង្កាត់បន្តទៀត គឺសង្កាត់ចុងឃ្នាស ក្រុងសៀមរាប, និងឃុំកំពង់ឃ្លាំង ស្រុកសូត្រនិគម។ តំបន់បេតិកភណ្ឌពិភពលោកអង្គរៈ រមណីយដ្ឋានអង្គរមាន ១១៤ភូមិ, ក្រុមការងារបានរៀបចំរួចរាល់ចំនួន ៤ ភូមិគឺ ភូមិខ្នាត ស្រុកពួក, ភូមិស្រះស្រង់ខាងត្បូង សង្កាត់នគរធំ ក្រុងសៀមរាប, ភូមិស្រះស្រង់ខាងជើង សង្កាត់នគរធំ ក្រុងសៀមរាប, ភូមិព្រះដាក់ ឃុំព្រះដាក់ ស្រុកបន្ទាយស្រី ហើយក្រុមការងារកំពុងរៀបចំបន្តទៀតចំនួន៥ គឺភូមិឪឡោក ឃុំបាគង ស្រុកប្រាសាទបាគង, ភូមិលលៃ ឃុំបាគង ស្រុកប្រាសាទបាគង, ភូមិស្ទឹង ឃុំបាគង ស្រុកប្រាសាទបាគង, ភូមិចំបក់ ឃុំរលួស ស្រុកប្រាសាទបាគង និងភូមិដូនទាវ ឃុំរលួស ស្រុកប្រាសាទបាគង។
នេះជាជំហានដ៏សំខាន់មួយទៀតរបស់ក្រសួងរៀបចំដែនដី នគរូបនីយកម្ម និងសំណង់ ក្រសួងវប្បធម៌ និងវិចិត្រសិល្បៈ ក្រុមការងាររាជរដ្ឋាភិបាលចុះមូលដ្ឋានខេត្តសៀមរាប អាជ្ញាធរជាតិអប្សរា អជ្ញាធរជាតិបឹងទន្លេសាប រដ្ឋបាលខេត្តសៀមរាប និងរដ្ឋបាលខេត្តទាំង៦ នៅជុំវិញតំបន់បឹងទន្លេសាប ក្នុងការរៀបចំកិច្ចពិគ្រោះយោបល់ ស្វែងរកផែនទីឯកភាពការងារ លើការរៀបចំប្លង់គោល ផែនការនៃការប្រើប្រាស់ដី តាមរយៈការកំណត់លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ក្នុងតំបន់រមណីយដ្ឋានបេតិកភណ្ឌពិភពលោកអង្គរ និងតំបន់បឹងទន្លេសាប មុននឹងឈានទៅរៀបចំប្លង់គោលនៃការប្រើប្រាស់ដីទាំង ១៦៥២ឃុំ នៅទូទាំងប្រទេស ។
