មណ្ឌលគិរី៖ ក្រុមហ៊ុន Renaissance Minerals (Cambodia) Limited របស់ប្រទេសអូស្ត្រាលី បានបើកការដ្ឋានអាជីវកម្ម និងរោងចក្រចម្រាញ់ «រ៉ែមាស» នៅតំបន់អូរខ្វាវ ស្រុកកែវសីមា ខេត្តមណ្ឌលគិរី តាំងពីថ្ងៃទី២១ ខែមិថុនា ឆ្នាំ២០២១មក ជាមួយនឹងដើមទុនវិនិយោគ ១២០លានដុល្លារ។ គិតត្រឹមត្រីមាសដំបូង ឆ្នាំ២០២៥ Renaissance Minerals (Cambodia) Limited បានផលិតមាសរហូតដល់ ១៣ ៧២០.៩ គីឡូក្រាម។ នេះជាការលើកឡើងរបស់លោក Bernie Cleary នាយកគ្រប់គ្រងនៃក្រុមហ៊ុន Renaissance Minerals (Cambodia ) Limited ។
លោកបានមានប្រសាសន៍ទៀតថា ៖ គម្រោងទាញយករ៉ែមាសនៅតំបន់អូរខ្វាវរបស់ក្រុមហ៊ុន មានផ្ទៃប្រមាណជាង ១ពាន់ហិកតា និងកំពុងប្រើប្រាស់បុគ្គលិករាប់រាយនាក់។ បច្ចុប្បន្ន ការដ្ឋាននេះ មានបុគ្គលិកសរុប ៧៥០នាក់ ក្នុងនោះមានខ្មែរ ៦៥៩នាក់។ ចំពោះបុគ្គលិកប្រចាំនៅការដ្ឋាន មានចំនួន៥៥០នាក់ ក្នុងនោះមានបុគ្គលិកជាស្រ្តីចំនួន៦០នាក់។ ការដ្ឋានអាជីវកម្ម និងរោងចក្រចម្រាញ់«រ៉ែមាស»របស់ក្រុមហ៊ុននេះ គឺជាលក្ខណៈឧស្សាហកម្មលើកដំបូងរបស់កម្ពុជា។ ដោយឡែក ក្រុមហ៊ុន Renaissance Minerals (Cambodia) Limited ក៏កំពុងសិក្សាពីលទ្ធភាពក្នុងការរុករករ៉ែមាស នៅក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ ផងដែរ។
លោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានឱ្យដឹងថា មុនទាញយក និងផលិតរ៉ែមាសនៅក្នុងតំបន់អូរខ្វាវស្រុកកែវសីមា ខេត្តមណ្ឌលគីរី ក្រុមហ៊ុន Renaissance Minerals (Cambodia) Limited របស់អូស្ត្រាលីបានចំណាយពេលសិក្សាអស់ជិត១៥ឆ្នាំ ហើយនៅមុនពេលក្រុមហ៊ុនទទួលបានលទ្ធផលដូចសព្វថ្ងៃនេះ វិស័យរ៉ែមាសមានបញ្ហាប្រឈមមួយចំនួន ។
លោកបន្តថា ក្នុងឆ្នាំ២០២៤កន្លងទៅ រដ្ឋបានប្រមូលចំណូលមិនមែនសារពើពន្ធពីវិស័យរ៉ែបានប្រមាណ៩០លានដុល្លារអាមេរិក ដោយឡែកសម្រាប់ក្រុមហ៊ុន Renaissance ដែលជាក្រុមហ៊ុនកំពុងទាញយកនិងចម្រាញ់រ៉ែមាសនៅខេត្តមណ្ឌលគិរី រដ្ឋទទួលចំណូលមិនមែនសារពើពន្ធបានប្រមាណ៥០លានដុល្លារអាមេរិក ។
លោកថា ៖
« ចំណូលដែលក្រសួងប្រមូលបាននេះ បើធៀបនឹងចំណូលថ្នាក់ជាតិទាំងមូលគឺនៅមានចំនួនតិចតួចនៅឡើយ ប៉ុន្តែអ្វីដែលរដ្ឋទទួលបានមកវិញនោះ គឺការផ្ដល់ការងារជូនប្រជាពលរដ្ឋ រាប់ចាប់តាំងពីចុងភៅ អ្នកដាំដំណាំ ផ្លែឈើ អ្នកចិញ្ចឹមសត្វ ព្រោះថា ការងាររ៉ែនេះ មិនមែនផ្ដល់ការងារសម្រាប់តែបុគ្គលិកក្នុងវិស័យរ៉ែមួយនោះទេ ពោលគឺផ្ដល់ការងារជាច្រើនទៀត » ។
លោក នូ ផល្លា នាយកផ្នែករដ្ឋបាលនៃក្រុមហ៊ុននៃក្រុមហ៊ុន Renaissance Minerals បានមានប្រសាសន៍ថា រាល់បុគ្គលិកមុនចូលបម្រើការងារទាំងមានជំនាញ និងមិនមានជំនាញត្រូវឆ្លងកាត់ការបណ្ដុះបណ្ដាលពីសំណាក់ក្រុមហ៊ុនជាមុនសិន ដើម្បីឱ្យប្រាកដថាបុគ្គលិកពិតជាអាចបម្រើការងារបានយ៉ាងល្អ និងមានប្រសិទ្ធភាព ៕
