រាជធានីភ្នំពេញ៖ កាលព្រឹកថ្ងៃទី២៧ ខែវិច្ឆិកា ឆ្នាំ២០២៥ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានទទួលជួបពិភាក្សាការងារជាមួយ លោក សាឡឹម អាល់ ហ្សាមស៊ី (Salem Al Shamsi) អនុប្រធានសភាពាណិជ្ជកម្មឌូបៃ ក្នុងឱកាសដែលលោកដឹកនាំគណៈប្រតិភូធុរកិច្ចឌូបៃមកបំពេញទស្សនកិច្ចនៅកម្ពុជា។ ជំនួបនេះបានផ្តោតសំខាន់លើការរឹតចំណងមិត្តភាព និងការពង្រឹងកិច្ចសហប្រតិបត្តិការរវាងសភាពាណិជ្ជកម្មទាំងពីរ សំដៅជំរុញពាណិជ្ជកម្ម និងការវិនិយោគរវាងព្រះរាជាណាចក្រកម្ពុជា និងអេមីរ៉ាត់អារ៉ាប់រួម (UAE) ព្រមទាំងការបង្កើតយន្តការជាក់លាក់ ដើម្បីអនុវត្តគម្រោងសក្តានុពលនានាឱ្យមានប្រសិទ្ធភាពខ្ពស់។
ថ្លែងក្នុងកិច្ចប្រជុំនេះ អ្នកឧកញ៉ា គិត ម៉េង បានសម្តែងការស្វាគមន៍យ៉ាងកក់ក្តៅចំពោះគណៈប្រតិភូធុរកិច្ចឌូបៃ និងបានគូសបញ្ជាក់អំពីទំនាក់ទំនងដ៏ល្អប្រសើររវាងប្រទេសទាំងពីរ ទាំងលើវិស័យសេដ្ឋកិច្ច ទេសចរណ៍ និងទំនាក់ទំនងរវាងប្រជាជននិងប្រជាជន ជាពិសេសការសម្រេចបាននូវកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ។
អ្នកឧកញ៉ាប្រធាន បានសង្កត់ធ្ងន់ថា ភាពជាដៃគូរវាងវិស័យឯកជននៃប្រទេសទាំងពីរ ត្រូវបានកសាងឡើងយ៉ាងរឹងមាំតាមរយៈការរៀបចំព្រឹត្តិការណ៍ធំៗជាបន្តបន្ទាប់ ដូចជា៖ វេទិកាធុរកិច្ចកម្ពុជា-អេមីរ៉ាត់អារ៉ាប់រួម នៅទីក្រុងអាប៊ូដាប៊ី ក្នុងឆ្នាំ២០២២ វេទិកាធុរកិច្ចលើកទី២ នៅរាជធានីភ្នំពេញ ក្នុងឆ្នាំ២០២៣ និងនៅឆ្នាំ២០២៥ នេះ សភាពាណិជ្ជកម្មកម្ពុជាបានសហការរៀបចំវេទិកាធុរកិច្ចជាមួយសភាពាណិជ្ជកម្មឌូបៃ ស្តីពី “ការធ្វើធុរកិច្ចនៅកម្ពុជា” ផងដែរ។
អ្នកឧកញ៉ាប្រធាន បានចាត់ទុកកិច្ចពិភាក្សានេះថាជាការបើកច្រក និងពង្រីកឱកាសសម្រាប់ធុរជននៃប្រទេសទាំងពីរក្នុងការជជែកអំពីគម្រោងសក្តានុពល។ ក្នុងន័យនេះ សភាពាណិជ្ជកម្មកម្ពុជា ត្រៀមខ្លួនជានិច្ចក្នុងការសម្របសម្រួលដល់ធុរជនឌូបៃដែលមានបំណងមកវិនិយោគនៅកម្ពុជា។ ទន្ទឹមនឹងនេះ អ្នកឧកញ៉ាប្រធាន ក៏បានស្នើឱ្យសភាពាណិជ្ជកម្មឌូបៃ ជួយលើកទឹកចិត្តធុរជនរបស់ខ្លួនឱ្យបង្កើនការផ្សារភ្ជាប់ទំនាក់ទំនង និងពិនិត្យលទ្ធភាពសហការជាមួយធុរជនកម្ពុជាលើវិស័យសំខាន់ៗដូចជា៖ ទេសចរណ៍ កសិកម្ម ថាមពល បច្ចេកវិទ្យា និងវិស័យធនាគារនិងហិរញ្ញវត្ថុ។
លោក សាឡឹម អាល់ ហ្សាមស៊ី បានថ្លែងអំណរគុណយ៉ាងជ្រាលជ្រៅចំពោះ អ្នកឧកញ៉ា គិត ម៉េង ដែលបានទទួលជួបពិភាក្សាការងារ។ លោកបានជម្រាបជូនថា សភាពាណិជ្ជកម្មឌូបៃ គឺជាស្ថាប័នដ៏ធំមួយដែលមានសមាជិកជាង ២០ម៉ឺនក្រុមហ៊ុន ហើយសមាជិកទាំងនោះកំពុងស្វែងរកកាលានុវត្តភាពនៅបរទេស និងពង្រីកកិច្ចសហប្រតិបត្តិការក្នុងតំបន់។ ដំណើរទស្សនកិច្ចមកកាន់កម្ពុជានាពេលនេះ គឺដើម្បីស្វែងរកដៃគូសហការជាមួយក្រុមហ៊ុនកម្ពុជា ដោយលោកបានកោតសរសើរយ៉ាងខ្លាំងចំពោះការអភិវឌ្ឍហេដ្ឋារចនាសម្ព័ន្ធ និងបដិសណ្ឋារកិច្ចដ៏ល្អរបស់កម្ពុជា។
លោក បានបង្ហាញក្តីរីករាយចំពោះកិច្ចសហការរៀបចំវេទិកាធុរកិច្ចនៅរាជធានីភ្នំពេញ និង អញ្ជើញ អ្នកឧកញ៉ា គិត ម៉េង ដឹកនាំគណៈប្រតិភូធុរកិច្ចទៅទស្សនកិច្ចនៅទីក្រុងឌូបៃក្នុងពេលវេលាសមស្របណាមួយ។ លោកបានបញ្ជាក់បន្ថែមថា ទីក្រុងឌូបៃគឺជាច្រកទ្វារដ៏សំខាន់ទៅកាន់អេមីរ៉ាត់អារ៉ាប់រួម និងតំបន់មជ្ឈិមបូព៌ា ដោយបច្ចុប្បន្នសភាពាណិជ្ជកម្មឌូបៃមានការិយាល័យតំណាងចំនួន ១៤ នៅទ្វីបអាស៊ី ដែលដើរតួនាទីយ៉ាងសកម្មក្នុងការសម្របសម្រួលពាណិជ្ជកម្ម និងវិនិយោគជាសកល។
