កំពត ៖ ជាការកត់សម្គាល់ នៅរៀងរាល់ថ្ងៃចុងសប្ដាហ៍ ឬថ្ងៃឈប់សម្រាកក្នុងពិធីបុណ្យផ្សេងៗ ស្ពានថ្មីឆ្លងព្រែកកំពត តែងតែមានការកកស្ទះដោយសារតែកំណើនភ្ញៀវទេសចរទៅលេងច្រើន ដូច្នេះហើយរដ្ឋបាលខេត្តកំពត មានគម្រោងសាងសង់ស្ពានថ្មីមួយខ្សែទៀត ឆ្លងព្រែកកំពត ឬព្រែកកំពង់បាយ ដើម្បីសម្រួលដល់ការធ្វើដំណើររបស់ភ្ញៀវទេសចរទៅលេងខេត្តដែលមានសក្ដានុពលមួយនេះ ក៏ដូចជា តាមបណ្តារមណីយដ្ឋាននានាក្នុងខេត្ត ដូចជា ភ្នំបូកគោ ទឹកឈូ ដូងទេរ ចុងព្រែក និងរមណីយដ្ឋានកែច្នៃនៃវិស័យឯកជនផងដែរ ។
នៅក្នុងកិច្ចប្រជុំមួយកាលពីពេលថ្មីៗនេះ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានលើកឡើងថា ដោយសារតែកំណើនភ្ញៀវទេសចរមកលេងខេត្តកំពតកាន់តែច្រើន ធ្វើឱ្យមានការកកស្ទះនៅគល់ស្ពានព្រែកកំពត ខណៈដែលស្ពានចាស់ (ស្ពានឥន្ធនូ ) មានសភាពចាស់ទ្រុឌទ្រោម មិនអនុញ្ញាតឱ្យរថយន្តឆ្លងកាត់បាន ពោលគឺឆ្លងកាត់បានត្រឹមតែអ្នកថ្មើរជើង និងម៉ូតូ ដែលធ្វើឱ្យស្ពានថ្មីមានការកកស្ទះជាប្រចាំ ជាពិសេសនៅរៀងរាល់ថ្ងៃសៅរ៍ និងថ្ងៃអាទិត្យ ក៏ដូចជាថ្ងៃឈប់សម្រាកបុណ្យជាតិធំៗ។
ឯកឧត្តម អភិបាលបានបញ្ជាក់ថា ៖ «ដើម្បីកាត់បន្ថយការកកស្ទះនៅលើស្ពានថ្មី និងក្រុងកំពត រដ្ឋបាលខេត្តកំពតសម្រេចថា នឹងសាងសង់ស្ពានមួយខ្សែទៀត ឆ្លងកាត់ព្រែកកំពត ឬព្រែកកំពង់បាយនៅពេលឆាប់ៗនេះ។ ម្យ៉ាងវិញទៀត ស្ពានដែលគ្រោងនឹងសាងសង់ថ្មីនេះ មិនត្រឹមតែសម្រាប់ឆ្លងកាត់ធម្មតាប៉ុណ្ណោះទេ ប៉ុន្តែនឹងសាងសង់ឡើងតាមរចនាបថពិសេសដែលមានសោភ័ណភាព និងអាចទាក់ទាញភ្ញៀវទេសចរជាតិ និងអន្តរជាតិផងដែរ» ។
ជាមួយនឹងផែនការអភិវឌ្ឍហេដ្ឋារចនាសម្ព័ន្ធនានានៅទូទាំងក្រុងកំពត ក៏ដូចជាខេត្តទាំងមូល កាលពីពេលថ្មីៗនេះ រដ្ឋបាលខេត្តកំពត ក្រោមវត្តមានរបស់ឯកឧត្តម ម៉ៅ ធនិនបានបើកការដ្ឋានសាងសងនាឡិកាយក្សកម្ពស់៣៥ម៉ែត្រ ដោយគ្រោងនឹងបញ្ចប់នៅចុងឆ្នាំ២០២៤នេះ ពោល គឺនឹងបញ្ចប់នៅមុនឆ្លងចូលឆ្នាំសកល ២០២៤ ចូល ២០២៥ ដើម្បីទាក់ទាញទេសចរមកលេងខេត្តកំពតកាន់តែច្រើនបន្ថែមទៀត ៕
