ភ្នំពេញ ៖ កាលពីពេលថ្មីៗនេះ ប្រមុខរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសអនុវត្តន៍កម្មវិធីផ្ដល់ដីការពារព្រៃ ដោយរដ្ឋនឹងផ្ដល់ដីជូនដល់ប្រជាជនកម្ពុជាក្រីក្រពិតប្រាកដមិនមានដីកម្មសិទ្ធិអាចទទួលបានដីសម្រាប់តាំងទីលំនៅ និងបង្កបង្កើនផល ។ បន្ទាប់ពីប្រមុខរាជរដ្ឋាភិបាលប្រកាសពីការផ្ដល់ដីនេះរួចមក មានពលរដ្ឋជាច្រើនចង់ដឹងពីលក្ខខណ្ឌបែបណាដែលអាចទទួលបានដីពីការផ្ដល់ជូនរបស់រដ្ឋ ។
ឯកឧត្តម សរ សុវណ្ណ រដ្ឋមន្ត្រីប្រតិភូរាជរដ្ឋាភិបាល និងជាប្រធានលេខាធិការដ្ឋាននៃគណៈកម្មាធិការជាតិដឹកនាំអនុវត្តន៍កម្មវិធីផ្ដល់ដីដើម្បីការពារព្រៃ រួមគ្នាអភិវឌ្ឍន៍ដោយចីរភាពហៅកាត់ថា ផ អ ក បានមានប្រសាសន៍ថា មែនទែនទៅ នៅប្រទេសកម្ពុជា រាជរដ្ឋាភិបាលបានផ្ដល់ដីដល់ពលរដ្ឋចំនួន៤លើកមកហើយ តាំងពីឆ្នាំ១៩៩១ម្ល៉េះ ដោយគិតជាទំហដីប្រមាណ ១លាន ៤សែនហិកតា និងមានពលរដ្ឋប្រមាណ ៤៩ម៉ឺនគ្រួសារទទួលបានបានដី ។
ឯកឧត្តមបន្តថា ៖
«សម្រាប់កម្មវិធីផ្ដល់ដីដើម្បីការពារព្រៃរួមគ្នាអភិវឌ្ឍន៍ដោយចីរភាព ដែលសម្ដេចមហាបវរធិបតី ហ៊ុន ម៉ាណែត បានបង្កើតឡើងដោយផ្ទាល់ ក្នុងគោលបំណងផ្ដល់ដីជូនបងប្អូនប្រជាពលរដ្ឋយើងដែលអត់ដី ក្រីក្រ ហើយមានឆន្ទៈក្នុងការទៅរស់នៅតាំងទីលំនៅក្នុងតំបន់នោះ ។ កម្មវិធីនេះ ក៏មានគោលបំណងការពារព្រៃ ការពារដីរដ្ឋ ទប់ស្កាត់ដីព្រៃ ដីរដ្ឋ និងរួមគ្នាការពារអភិរក្សដីព្រៃ ដីរដ្ឋ។ ពលរដ្ឋដែលមានលក្ខណៈសម្បត្តិសំខាន់ ៤ចំណុច នឹងអាចទទួលដីពីរដ្ឋ ក្នុងនោះរួមមាន ជាប្រជាជនកម្ពុជាដែលមានសញ្ជាតិខ្មែរតាំងពីកំណើត ជាប្រជាជនដែលមិនមានដីពិតប្រាកដ និងក្រីក្រពិតប្រាកដ ដោយមានការបញ្ជាក់ពីអាជ្ញាធរមូលដ្ឋានដែលគាត់កំពុងរស់នៅ និងចំណុចចុងក្រោយគឺគាត់ពិតជាមានឆន្ទៈក្នុងការទៅរស់នៅក្នុងតំបន់ដែលរដ្ឋផ្ដល់ដីជូននោះពិតប្រាកដ» ។
ឯកឧត្តមរដ្ឋមន្ត្រីប្រតិភូរូបនេះបានបន្ថែមថា សម្រាប់តំបន់ដែលរដ្ឋចាប់ផ្ដើមអនុវត្តន៍ផ្ដល់ដីការពារព្រៃមុនគេគឺនៅខេត្តស្ទឹងត្រែង គឺនៅឃុំសានឃួយ ស្រុកសេសាន ខេត្តស្ទឹងត្រែង ដោយចាប់ផ្ដើមបែងចែងដី ទំហំ ៣ពាន់ហិកតា ហើយប្រជាពលរដ្ឋដែលនឹងទទួលបានដីនៅទីនោះ ក្នុងមួយគ្រួសារ ៣ហិកតា ទាំងដីលំនៅឋាន និងដីបង្កបង្កើនផល ។ សម្រាប់ពេលវេលាដែលចាប់ផ្ដើមគឺចាប់ពីថ្ងៃទី០១ ខែកុម្ភៈ ឆ្នាំ ២០២៥តទៅ ។
សូមរំលឹកដែរថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាណាចក្រកម្ពុជា កាលពីពេលថ្មីៗនេះ បានមានប្រសាសន៍ឱ្យដឹងថា ការអនុវត្តកកម្មវិធីផ្ដល់ដីការពារព្រៃនេះគឺប្រៀបដូចជាព្រួញមួយបាញ់បានចាបពីរ ដោយរដ្ឋនឹងជួយលើកលទ្ធភាពពលរដ្ឋដែលអត់មានដីពិតប្រាកដឱ្យទទួលបានដីរស់នៅ និងអាស្រ័យផល មានប្លង់កម្មសិទ្ធិត្រឹមត្រូវ ហើយពលរដ្ឋដែលរស់នៅតំបន់នោះនឹងជួយរដ្ឋាភិបាលវិញតាមរយៈការពារការដីព្រៃ ទប់ស្កាត់ការកាប់ទន្ទ្រានដីព្រៃ និងដីរដ្ឋធ្វើជាកម្មសិទ្ធិឯកជន ៕
