ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានសហការជាមួយក្រសួងធនធានទឹក និងឧត្តុនិយម រួមជាមួយនឹហក្រសួងសាធារណការ និងដឹកជញ្ជូន ព្រមទាំងរដ្ឋបាលខេត្តកណ្ដាល និងកំពង់ស្ពឺ ប្រែក្លាយមុខងារប្រឡាយដែលមានស្រាប់ឱ្យកាន់តែមានប្រយោជន៍ជាងនេះបន្ថែមទៀត ដើម្បីបង្កើនគុណភាពជីវិតរបស់ប្រជាពលរដ្ឋ ។ នេះបើតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ចេញផ្សាយក្រោយកិច្ចប្រជុំអន្តរក្រសួង ស្ដីពីសំណង់ និងដីចំណីប្រឡាយ លេខ៦១ ក្នុងភូមិសាស្ត្រខេត្តកណ្ដាល និងខេត្តកំពង់ស្ពឺកាលពីថ្ងៃចុងសប្ដាហ៍កន្លងទៅនេះ។
បើតាមសេចក្ដីប្រកាសព័ត៌មានដដែលនេះបានឱ្យដឹងថា កិច្ចប្រជុំនាពេលនេះធ្វើឡើងក្នុងគោលបំណងដើម្បីស្នើសុំមតិយោបល់ និងធាតុចូលពីក្រសួងធនធានទឹក និងឧតុនិយម ចំពោះបញ្ហាដីចំណីប្រឡាយដែលកំពុងតែជួបប្រទះសព្វថ្ងៃនេះនៅក្នុងខេត្តកំពង់ស្ពឺ និងខេត្តកណ្ដាល ។
នៅក្នុងកិច្ចប្រជុំនោះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបង្ហាញពីក្ដីសង្ឃឹមថា កិច្ចប្រជុំនេះនឹងអាចរកឃើញនូវជំហរជាក់លាក់មួយ ជាគំរូសម្រាប់ដោះស្រាយបញ្ហាដីចំណីប្រឡាយនេះនៅទូទាំងប្រទេស។
ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ៖
«ក្នុងក្របខណ្ឌនគរូបនីយកម្ម យើងអាចដោះស្រាយមុខងារប្រឡាយនេះដែលមិនត្រឹមតែជាប្រឡាយសម្រាប់ស្រោចស្រព រឺរំដោះទឹកប៉ុណ្ណោះទេ ប៉ុន្តែក៏អាចប្រែក្លាយទៅជាផ្លូវ, សួនទឹកលម្អក្រុង រឺលំហសាធារណៈសម្រាប់ប្រជាពលរដ្ឋផងដែរ»។
ឯកឧត្តមឧបនាយករដ្ឋមន្ត្រី ក៏បានចាត់ទុកកិច្ចប្រជុំនាពេលនេះថា ជាកិច្ចប្រជុំដ៏មានសារៈសំខាន់ ដោយក្រសួងរៀបចំដែនដី នគរូបនីយកម្ម និងសំណង់ បានកសាងនូវវប្បធម៌ថ្មីមួយទៀតលើកិច្ចសហប្រតិបត្តិការជាមួយក្រសួងធនធានទឹក និងឧតុនិយម, ក្រសួងសាធារណការ និងដឹកជញ្ជូន និងរដ្ឋបាលខេត្ត ដោយរួមបញ្ចូលគ្នារវាងកិច្ចការរៀបចំក្រុង, កិច្ចការនគរូបនីយកម្ម ជាមួយនឹងសំណង់ធារាសាស្រ្ត និងបច្ចេកទេសសាធារណការ សំដៅប្រែក្លាយអ្វីដែលមានស្រាប់ទៅជារបស់ដែលមានប្រយោជន៍សម្រាប់ប្រជាពលរដ្ឋទាំងអស់គ្នា ។
ម្យ៉ាងទៀត កិច្ចប្រជុំនាពេលនះ គឺធ្វើឡើងដើម្បីពិភាក្សាផ្តោតលើការគិតគូរប្រែក្លាយប្រឡាយឱ្យទៅជាផ្លូវ ជាសួនលម្អក្រុង និងបុរីជនបទ ដោយរក្សាមុខងារប្រឡាយដែលប្រើប្រាស់សម្រាប់ស្រោចស្រព និងរំដោះទឹកដដែល ស្របទៅតាមប្រសាសន៍ដឹកនាំរបស់សម្តេចមហាបវរធិបតី ហ៊ុន ម៉ាណែត ដែលបានដាក់ចេញគឺ ប្រែក្លាយទីកន្លែងជាច្រើនឱ្យទៅជាសួន និងលំហសាធារណៈ ដែលបង្កើតបាននូវសេចក្តីថ្លៃថ្នូរ សុភមង្គលរបស់ប្រជាជន និងគុណភាពមនុស្សរបស់កម្ពុជាទៅថ្ងៃអនាគត ជាសង្គមដែលមានមនោសញ្ចេតនាច្រើនជាងនេះបន្ថែមទៀត ៕
