ភ្នំពេញ ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំពិភាក្សាស្ដីពីការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់ ដែលបានធ្វើឡើងនៅទីស្ដីការក្រសួងកាលពីពេលថ្មីៗនេះ
ឯកឧត្តមបានបញ្ជាក់ថា ការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់នេះអាចធ្វើទៅបានលុះត្រាតែមានការឯកភាពផ្ទៃក្នុងគ្នាជាមុនសិន ទើបអាចបន្តទៅពិគ្រោះពិភាក្សាជាមួយសមាគមអ្នកអភិវឌ្ឍន៍លំនៅឋាន និងសមាគមអ្នកសាងសង់បាន។
ទន្ទឹមនេះ ឯកឧត្តម មានបំណងចង់ឱ្យសមាជិកទាំងអស់នៃកិច្ចប្រជុំ ក្លាយជាសមាជិកចូលរួមសកម្មក្នុងកិច្ចការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់។ ឯកឧត្តមឧបនាយករដ្ឋមន្ត្រីក៏បានជំរុញឱ្យគ្រប់ស្ថាប័នទាំងអស់ចូលរួម ដើម្បីស្តាប់អំពីបញ្ហាប្រឈម និងបង្កើតគំនិតថ្មីៗក្នុងការរៀបចំបែបបទ និងបទបញ្ញត្តិនានាសំរាប់ការផ្ដល់លិខិតអនុញ្ញាតសាងសង់ឱ្យបានត្រឹមត្រូវ មានលក្ខណៈល្អប្រសើរ និងគ្រប់ជ្រុងជ្រោយបន្ថែមទៀត។
គួរបញ្ជាក់ផងដែរថា តាមរយៈបរិបថថ្មី រាល់លិខិតស្នើសុំសាងសង់ទាំងចូលមកតាមអនឡាញ ឬចូលមកដោយផ្ទាល់ ឬតាមច្រកចេញចូលតែមួយក្តី អគ្គនាយកដ្ឋានរដ្ឋបាល និងហិរញ្ញវត្ថុ ត្រូវមានភារកិច្ចធ្វើចរន្តឯកសារ ដោយពិនិត្យផ្ទៀងផ្ទាត់លើឯកសារទាំងនោះ និងបញ្ជូនទៅខាងអគ្គនាយកដ្ឋានសុរិយោដី និងភូមិសាស្ត្រ អគ្គនាយកដ្ឋានរៀបចំដែនដី និងអគ្គនាយកដ្ឋានលំនៅដ្ឋាន ដើម្បីពិនិត្យបន្ត។ បន្ទាប់មកត្រូវបញ្ជូនសំណុំឯកសារទាំងនោះទៅការិយាល័យច្រកចេញចូលតែមួយ ហើយការិយាល័យនឹងបញ្ជូនសំណុំឯកសារទាំងនោះមកអគ្គនាយកដ្ឋានសំណង់ ដើម្បីបូកសរុបបច្ចេកទេស និងព្រាងលិខិតអនុញ្ញាតសាងសង់ រួចត្រូវបញ្ជូនសំណុំឯកសារទាំងនោះទៅការិយាល័យច្រកចេញចូលតែមួយវិញ ដើម្បីស្នើសុំគោលការណ៍ពីឯកឧត្តមឧបនាយករដ្ឋមន្ត្រី និងក្រុមការងារជំនាញ ហើយការិយាល័យច្រកចេញចូលតែមួយត្រូវបើកកិច្ចប្រជុំ ធ្វើរបាយការណ៍ និងស្នើសុំការពិនិត្យសម្រេចពីឯកឧត្តមឧបនាយករដ្ឋមន្ត្រី ៕
