ភ្នំពេញ ៖ ធនាគារ វីង (ខេមបូឌា) ម.ក ដែលជាធនាគារក្នុងស្រុកដ៏ធំជាងគេប្រចាំព្រះរាជាណាចក្រកម្ពុជា និងជាបុត្រសម្ព័ន្ធក្រុមហ៊ុន ROYAL Group របស់កំពូលមហាសេដ្ឋី អ្នកឧកញ៉ា គិត ម៉េង នៅថ្ងៃទី២៣ ខែកុម្ភៈ ឆ្នាំ២០២៤នេះ បានចុះហត្ថលេខាជាមួយក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ ម.ក ក្នុងនាមជាដៃគូអាជីវកម្ម ប៊េនកាសួរេន ដែលគាំទ្រដោយនិយ័តករធានារ៉ាប់រងនៃកម្ពុជា និងធនាគារ ជាតិ នៃកម្ពុជា។
ភាពជាដៃគូយុទ្ធសាស្ត្រនេះធ្វើឡើងក្នុងគោលបំណងបង្កើនវិសាលភាពក្នុងការផ្តល់សេវាធានារ៉ាប់រងអាយុជីវិត ក៏ដូចជាសេវាការពារហិរញ្ញវត្ថុដោយប្រើប្រាស់ចំណុចខ្លាំងនៃស្ថាប័នទាំងពីរក្នុងការផ្តល់សេវាកម្មហិរញ្ញវត្ថុឱ្យបានកាន់តែទូលំទូលាយ នៅក្នុងប្រទេសកម្ពុជា។ ប៊េងកាសួរេន ដែលត្រូវបានកំណត់និយមន័យដោយធនាគារជាតិ នៃកម្ពុជា គឺសំដៅដល់កិច្ចសហការរវាងគ្រឹះស្ថាន និងក្រុមហ៊ុនធានារ៉ាប់រងក្នុងការចែកចាយ និងផ្សព្វផ្សាយផលិតផលធានារ៉ាប់រងតាមរយៈការប្រើប្រាស់បណ្តាញគ្រឹះស្ថានដែលជាដៃគូ។
ពិធីសម្ពោធជាផ្លូវការនេះមានការអញ្ជើញចូលរួមជាកិត្តិយសក្រោមគណៈអធិបតីភាព ឯកឧត្តមបណ្ឌិត ម៉ី វ៉ាន់ រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាដ្ឋានអាជ្ញាធរសេវាហិរញ្ញវត្ថុមិនមែនធនាគារ, ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា, លោក ហេង បូមករា អគ្គនាយករងត្រួតពិនិត្យទី១ អគ្គនាយកដ្ឋានត្រួតពិនិត្យ នៃធនាគារជាតិនៃកម្ពុជា, អ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង និងជាអគ្គនាយកក្រុមហ៊ុនរ៉ូយ៉ាល់គ្រុប, លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា, លោក Han Peng Kwang អគ្គនាយកធនាគារ វីង, លោក Wilson Ma ប្រធានក្រុមប្រឹក្សាភិបាលនៃក្រុមហ៊ុនព្រូដិនសលកម្ពុជា និងជាប្រធានផ្នែកគ្រប់គ្រងអាជីវកម្ម និងយុទ្ធសាស្រ្ត នៃក្រុមហ៊ុនព្រូដិនសល ភីអិលស៊ី, លោក Mandar Hastekar អគ្គនាយកស្តីទី និងនាយកផ្នែកហិរញ្ញវត្ថុ នៃក្រុមហ៊ុនព្រូដិនសលកម្ពុជា (CLM Hub) ព្រមទាំងវត្តមានអតិថិជន និងភ្ញៀវកិត្តិយសជាច្រើនរូប។
ធនាគារឌីជីថលមួយដែលកំពុងរីកចម្រើនយ៉ាងឆាប់រហ័សនៅកម្ពុជា ធនាគារ វីង ប្តេជ្ញាចិត្តលើកកម្ពស់បរិយាបន្នហិរញ្ញវត្ថុ តាមរយៈការផ្ដល់ដំណោះស្រាយហិរញ្ញវត្ថុប្រកបដោយភាពច្នៃប្រឌិត។ ដោយមានសាខាជាច្រើនកំពុងដំណើរការ ជាមួយនឹងបណ្តាញវីងជាង ១១.០០០ ទីតាំងគ្រប់ដណ្តប់នៅទូទាំងប្រទេសផងដែរនោះ ធនាគារ វីង បានផ្តល់សេវាកម្មទៅដល់អ្នកប្រើប្រាស់ជាង ១៤,៥លាននាក់។
កិច្ចសហការនេះកំពុងតែបន្តឆ្ពោះទៅមុខ ដើម្បីបង្កើនលទ្ធភាពទទួលបានការការពារហិរញ្ញវត្ថុកាន់តែប្រសើរសម្រាប់ប្រជាជនកម្ពុជាគ្រប់រូប។
លោក Mandar Hastekar បានលើកឡើងថា៖ «កិច្ចសហការរបស់យើងជាមួយធនាគារ វីង គឺជាជំហានដ៏សំខាន់មួយឆ្ពោះទៅជំរុញបរិយាបន្នហិរញ្ញវត្ថុនៅក្នុងប្រទេសកម្ពុជាតាមរយៈកិច្ចសហការរួមគ្នាដោយនាំមកជាមួយជំនាញរបស់ក្រុមហ៊ុនព្រូដិនសល កម្ពុជា ក្នុងការពារហិរញ្ញវត្ថុ និងបណ្តាញរបស់ធនាគារ វីង នឹងជំរុញការផ្តល់សេវាធានារ៉ាប់រងឱ្យបានកាន់តែទូលំទូលាយទៅដល់សហគមន៍”។
លោក Mandar Hastekar បានបន្ថែមថា៖ «ភាពជាដៃគូនេះគឺឆ្លុះបញ្ជាំងពីការប្តេជ្ញាចិត្តរបស់យើងខ្ញុំ ដោយនាំមកនូវអនាគតកាលដ៏ត្រចះត្រចង់តាមរយៈការផ្តល់ជូននូវស្ថិរភាពហិរញ្ញវត្ថុទៅដល់គ្រប់គ្រួសារកម្ពុជា”។
ឥឡូវនេះ អតិថិជនមានភាពងាយស្រួលក្នុងការទិញផលិតផលរបស់ក្រុមហ៊ុនព្រូដិនសល ដោយផ្ទាល់នៅតាមទីតាំងសាខាធនាគារ វីងដែលបានអនុម័តនៅទូទាំងប្រទេសកម្ពុជា ដែលមានបុគ្គលិកប្រកបដោយជំនាញវិជ្ជាជីវៈដើម្បីជួយសម្របសម្រួលរាល់តម្រូវការសេវាហិរញ្ញវត្ថុជូនទៅដល់អតិថិជន។
ដើម្បីអបអរដល់កិច្ចសហការនេះ អតិថិជនដែលទិញផលិតផលធានារ៉ាប់រងណាមួយពីក្រុមហ៊ុនព្រូដិនសល កម្ពុជា តាមរយៈធនាគារ វីង នឹងទទួលបានការផ្ដល់ជូនដ៏ពិសេសដូចជា៖ ទទួលបានអត្រាការប្រាក់ពិសេសសម្រាប់ការដាក់ប្រាក់បញ្ញើមានកាលកំណត់រយៈពេល ១២ ខែក្នុងចំនួនទឹកប្រាក់ណាមួយ ព្រមទាំងទទួលបានផលិតផលធានារ៉ាប់រងគ្រោះថ្នាក់ចរាចរណ៍តាមដងផ្លូវ ឬហៅថា PRUសុវត្ថិភាពខ្ញុំ ដោយឥតគិតថ្លៃ និងការផ្ដល់ជូនពិសេសផ្សេងៗទៀត។ ការផ្ដល់ជូននេះមានរយៈពេលត្រឹមតែមួយខែប៉ុណ្ណោះ ដោយចាប់ផ្តើមពីថ្ងៃទី២៣ ខែកុម្ភៈ ឆ្នាំ ២០២៤ តទៅ។
លោក Han Peng Kwang អគ្គនាយកធនាគារ វីង បានលើកឡើងថា៖ «ភាពជាដៃគូនេះគឺជាការវិវឌ្ឍដ៏សំខាន់ ដើម្បីបង្កើនការការពារហិរញ្ញវត្ថុជូនអតិថិជនគ្រប់រូប ដែលជាការរួមចំណែកទៅដល់ស្ថិរភាព និងសុវត្ថិភាពគ្រប់ក្រុមគ្រួសារ ក៏ដូចជាសហគ្រាសនៅក្នុងប្រទេសកម្ពុជា»។
លោក Han Peng Kwang បានបន្តថា៖ «ជាមួយចក្ខុវិស័យរួមគ្នាក្នុងការផ្តល់ការការពារហិរញ្ញវត្ថុដ៏រឹងមាំជូនសហគមន៍ និងអតិថិជនទាំងអស់ កិច្ចសហការរបស់យើងនាពេលនេះគឺជាការវិវឌ្ឍដ៏សំខាន់មួយទៀតឆ្ពោះទៅសម្រេច គោលដៅរួម និងជួយដល់ប្រជាជនកម្ពុជាគ្រប់រូបឱ្យទទួលបាននូវអនាគតកាន់តែមានសុវត្ថិភាព និងល្អប្រសើរ»។
