ព្រះសីហនុ ៖ គម្រោងសណ្ឋាគារផ្កាយ៥ និងមជ្ឈមណ្ឌលពាណិជ្ជកម្ម Peninsula Integrated Resort នៅខេត្តព្រះសីហនុ ក្នុងទុនវិនិយោគប្រមាណជាង៥០០លានដុល្លារអាមេរិក សម្រេចបានការសាងសង់ប្រមាណ១៣ភាគរយហើយ គិតត្រឹមខែធ្នូ ឆ្នាំ២០២៤នេះ ហើយគម្រោងនេះដែរនឹងត្រូវបន្ថែមទុនវិនិយោគរហូតដល់៣០០លានដុល្លារអាមេរិកបន្ថែមទៀត ។
យោងតាម លោក សេង អៀក ប្រធានរដ្ឋបាលនៃក្រុមហ៊ុនអភិវឌ្ឍន៍សណ្ឋាគារផ្កាយ៥ និងមជ្ឈមណ្ឌលពាណិជ្ជកម្ម Peninsula Integrated Resort បានមានប្រសាសន៍ថា រហូតមកដល់ខែធ្នូ ឆ្នាំ២០២៤នេះ គម្រោងសាងសង់សណ្ឋាគារផ្កាយ និងមជ្ឈមណ្ឌលពាណិជ្ជកម្មសម្រេចបានប្រមាណ១៣ភាគរយហើយ និងកំពុងដំណើរការអភិវឌ្ឍន៍ទៅមុខជាបន្តបន្ទាប់ ។
លោកបន្តថា ៖«គម្រោងដ៏ធំមួយនេះ គ្រោងនឹងបញ្ចប់ទាំងស្រុងនៅអំឡុងខែកុម្ភៈ ឆ្នាំ២០២៨ខាងមុខ ដោយបច្ចុប្បន្ន ក្រុមហ៊ុនសាងសង់បាន និងកំពុងពន្លឿនការសាងសង់ ដើម្បីឱ្យចប់ទៅតាមផែនការ ដោយបានប្រើប្រាស់កម្លាំងពលកម្មសរុបក្នុងការដ្ឋានប្រមាណ ១០០០នាក់ មកពីចម្រុះជាតិសាសន៍ ដូចជា ចិន ខ្មែរ នេប៉ាល់ និងបង់ក្លាដេស ជាដើម» ។
លោកបន្ថែមថា ៖«នៅក្នុងគម្រោងនេះ មានដូចជាសណ្ឋាគារផ្កាយ៥ មជ្ឈមណ្ឌលពាណិជ្ជកម្មជាច្រើនប្រភេទ និងផ្សារទំនើប ។ ដោយសារតែការសាងសង់គម្រោងនេះកាន់តែរីកធំជាងគម្រោងផែនការ ក្រុមហ៊ុនបានត្រៀមថវិកាបន្ថែមប្រមាណ៣០០លានដុល្លារអាមេរិក ដូច្នេះសរុបទឹកប្រាក់នៃការវិនិយោគលើគម្រោងនេះ អាចយ៉ាងហោចណាស់ក៏៨០០លានដុល្លារអាមេរិក ។ តាមរយៈគម្រោងនេះ នឹងជួយលើកមុខមាត់ខេត្តព្រះសីហនុបានមួយកម្រិតទៀត និងអាចជាសក្ដានុពលបន្ថែមសម្រាប់ទាក់ទាញការវិនិយោគពីបរទេសមកកាន់ប្រទេសកម្ពុជា និងជាពិសេសខេត្តព្រះសីហនុផ្ទាល់តែម្ដង» ។
លោក សេង អៀក បានបញ្ជាក់ថា នៅពេលគម្រោងមួយនេះ សាងសង់រួចរាល់ និងដាក់ដំណើរការ វាអាចនឹងផ្ដល់ការងារដោយផ្ទាល់ប្រមាណ ៤ពាន់នាក់ និងដោយប្រយោលជាច្រើននាក់ទៀត និងអាចជួយលើកកម្ពស់ជីវភាពប្រជាពលរដ្ឋ និងសេដ្ឋកិច្ចប្រទេសកម្ពុជាបានផងដែរ ។
ឯកឧត្តម ហ៊ាន សាហ៊ីប បានមានប្រសាសន៍ផងដែរទៅកាន់តំណាងក្រុមហ៊ុនអភិវឌ្ឍន៍គម្រោងសណ្ឋាគារផ្កាយ៥ និងមជ្ឈមណ្ឌលពាណិជ្ជកម្មមួយកាលពីសប្ដាហ៍មុនថា ការវិនិយោគនៅក្នុងខេត្តព្រះសីហនុ ត្រូវបានលើកទឹកចិត្តពីសំណាក់រាជរដ្ឋាភិបាល ដូច្នេះ បើសិនជាក្រុមហ៊ុនមានអ្វីចង់សំណូមពរដល់រាជរដ្ឋាភិបាល ក្រុមហ៊ុនអាចទាក់ទងទៅកាន់រដ្ឋបាលខេត្ត ក៏ដូចជាក្រុមការងារជំរុញការវិនិយោគក្នុងខេត្តព្រះសីហនុ ដើម្បីរកដំណោះស្រាយ ៕
